يوميات قارئ صحف: الخميس ٢٨ يناير ٢٠١٦

اليوم الثاني، والأخير، لـ «قارئ صحف متطوع» في زيارته القصيرة قبل عودة الزميل حسام بهجت من إجازته 🙂

جرايد النهاردة كلها ضحك وفرفشة.. ما بين صرخة مصطفي بكري لسيف اليزل: «إوعى تفصلني علشان إنت ما تقدرش تفصلني أصلاً»، أو تعامل الجرايد مع تقرير هيومن رايتس ووتش. ومعانا استكمال تغطية قضية شادي أبو زيد وأحمد مالك الشهيرة بواقعة الكاندوم، وحوارين مع فاطمة ناعوت على حكم حبسها ٣ سنين وتغريمها ٢٠ ألف جنيه قبل استئنافها الحكم، ومتابعة لكارثة الامتناع عن الصلاة على زوجين ماتا خنقًا في ليلة الدخلة، دا غير كتف قانوني إدته الكنيسة الأرثوذكسية في روسيا ومصر لنظيرتهم التركية، وبعض الجرايد لحقت في طبعاتها الثانية تفجير العريش اللي الهجمات الإرهابية اتنقلت ليها بعد م كانت على أطراف الشيخ زويد ورفح، والدولة كمان أعلنت رسميًا، وبعد تحضير طويل استمر لشهور، فتح ملف ماسبيرو رغم محاولات تطمين جيش الموظفين إن محدش هايحصله حاجة، وتغطية لأزمة الإخوان الداخلية المستمرة من شهور. وعندنا كمان في مصر عملية ناجحة لاستحضار روح المخرج العالمي كوينتن تارانتينو، وروح المؤلف العالمي جورج مارتن مؤلف رواية لعبة العروش.

***

اضحك من فضلك

هانبتدي مع الضحكة الحلوة: في جرايد الخميس، اللي كان فيها ٣ مستويات للتعامل مع تقرير هيومن رايتس ووتش السنوي لحقوق الإنسان حول العالم؛ التنفيض المطلق ودا اللي عمله معظم الجرايد في مصر. المستوى التاني اختار التعامل معاه وتخفيفه لأقصى درجة ممكنة وبشكل مخل. المستوى التالت: الاستهبال الكامل.

النكتة كان بطلها جرنال الشروق، والشرق الأوسط السعودي اللي اتعامل مع تقرير هيومن رايتس ووتش كالتالي: المنظمة سلطت الضوء على تنامي ظاهرة الإسلاموفوبيا في المجتماعات الأوروبية وانتقاده لحقوق الإنسان في أوروبا بسبب أزمة المهاجرين (والنبي إيه؟). في حين الشروق نقل مقدمة التقرير بعنوانها اللي هو سياسات الخوف تهدر حقوق الإنسان في العالم. بينما المصري اليوم اتعامل مع الموضوع بمنطق عين في الجنة وعين في النار: م يصحش نتجاهل التقرير عن مصر، وفي نفس الوقت هانخفف بأي شكل الانتقادات في خبر ١٥٠ كلمة عبارة إن ملف حقوق الإنسان في مصر خلال ٢٠١٥ كان عبارة عن أزمة. باقي جرايد مصر اختارت التنفيض.. ممكن تقرا التقرير عن طريق اختيار الدولة في الرابط دا.

الضحكة الحلوة بتسّمع تحت قبة البرلمان مع تصريح مصطفى بكري لقيادات دعم الدولة اللي نشرته البوابة تحت العنوان دا: «مصطفى بكري لدعم مصر: إوعوا تفصلوني وماتقدروش تعملوها»، ودا على خلفية تسريب قائمة سرية هايطردها الإئتلاف من عضويته زي ما قالت لنا الشروق، أو زي ما نقل لنا اليوم السابع إن فتنة طاهر أبو زيد ستعجّل بانهيار الإئتلاف.

 فيه مقال حلو من سلمى حسين في الشروق بتطالب فيه النواب بالضغط لزيادة الإنفاق العام على قطاعات الصحة والتعليم والبحث العلمي. وطبعًا فيه استجابة فورية من النواب اللي طلبوا فورًا زيادة مكافآتهم وبدلات حضورهم الجلسات، في مواجهة تحذير من هيثم الحريري لزمايله النوّاب عن الوضع الاجتماعي الخطير في البلد. لكن جرنال البوابة بشّرنا بإن «النائب الغشاش» رفض المثول قدام مجلس التأديب (نسختهم الورقية).

الضحك مكمّل مع الجرايد القومية. تقرير الشفافية الدولية اتنشر إمبارح، وجرايد نقلته النهاردة. المصري اليوم كان عنوانه نزيه: مصر تتراجع في مكافحة الفساد وتتقدم في الترتيب العام (كان عندنا السنة اللي فاتت ٣٧ نقطة في مكافحة الفساد، السنة دي بقت ٣٦. لكن في الترتيب العام بقينا في المركز ٨٨ بعد م كنا السنة اللي فاتت في المركز ٩٤ عالميا)، الأهرام كان عنوانه: «الشفافية الدولية: مصر تتقدم في محاربة الفساد» بدون م يجيبوا سيرة للنص التاني من الحقيقة :).

***

تنفيض

النهاردة الذكرى الخامسة ليوم من أهم أيام مصر: جمعة الغضب ٢٨ يناير، محدش افتكرها غير المصري اليوم اللي عمل تقرير عن الجيش (!) بعنوان أين ذهب أعضاء المجلس العسكري بعد ٥ سنوات من جمعة الغضب (اليوم اللي نزل فيه الجيش للشوارع)، في حين نشر موقع الإلكتروني بس، تقرير عن واحد من المعارك المنسيّة والعنيفة في اليوم دا، في شارع أحمد زكي في منطقة المعادي اللي اتقتل فيه ٨ مواطنين (بمعايير يناير ٢٠١١، الرقم دا من القتلى كان يخضّ).

***

هجوم رؤساء التحرير التنفيذيين

اليوم السابع نشر خبر حبس ٤ أعضاء قال إنهم من ٦ إبريل سنتين علشان اتظاهروا وقطعوا الطريق حسب حيثيات الحكم. وعلى سيرة الأحكام اللي من النورع دا؛ فـ الداخلية بتسنّ سنانها مدعومة بتمهيد نيراني مكثف عملته كتيبة من كتاب الأعمدة الصحفية.

رؤساء التحرير التنفيذيين لليوم السابع كانوا واقفين في عدد النهاردة على مدفع الأخلاق. مقال دندراوي، رئيس التحرير التنفيذي: نعيش زمن نخبة غمس الحياء والأخلاق في الواقي الذكري اللي اتهم فيه الدولة المرتعشة والمجتمع المتعاطف علي نفسه بنشر الانحطاط. ومقال أكرم القصاص، رئيس التحرير التنفيذي: زعماء الكاندوم ضحايا النفخ، اللي تساءل فيه عن زمن الأخلاق الضائع واتهم المتضامنين بالبارانويا لإنهم هاجموا قبل كدا ريهام سعيد. أو مقال بيدد على ضرورة العقاب علي لسان كريم عبد السلام، رئيس التحرير التنفيذي، اللي طالب فيه بعقاب التافهين. وم ينفعش مدير تحرير يفوت الحفلة؛ فـ عادل السنهوري كان بيدور في مقاله عن دور التربية والتعليم في تربية المنفلتين. وحمدي رزق كتب في المصري اليوم: عمال ينفخ في الكاندوم. في حين المصري اليوم كان الجرنال الوحيد اللي نقل وجهة نظر شادي أبو زيد لما أخد مقتطفات من البوست اللي كتبه علي صفحته الشخصية. والشروق كان فيه مقال عمرو حمزاوي بعنوان أسئلة أخرى عن الأخلاق بيطالب فيه بالمساواة بين مزاعم انتهاك الأفراد للأخلاق والوقائع الثابتة لانتهاك أجهزة الدولة وأفراد معلومين فيها للي نفس الدولة بتقول إنها «أخلاق».

بمناسبة الأخلاق؛ جرنال الأخبار عمل ملف كبير من صفحتين بيناقش فيه جرائم بيرتكبها الأطفال وعنوانه التمهيدي كان: البعض يطالب بإعدامهم (!).

***

فإن هم ذهبت أخلاقهم.. تاني مرّة

وكمان مرة الأخلاق، بتصريح من كاهن كنيسة المنيا اللي رفضت تصلي على عروسين من المسيحيين ماتوا ليلة الدخلة، نشرته البوابة بعنوان: كاهن كنيسة المنيا عن واقعة وفاة العروسين: عندهم كنيستهم. والمصري اليوم تابع إنفراد البوابة عن نفس القضية بتقرير فيه  تصريح من الأسقف العام لمطرانية المنيا بيقول فيه: أنا مسافر برا مصر دلوقت، ولما آجي هاطيّب بخاطرهم.

في مقابل دا عندنا تصريح جميل من رئيس جامعة القاهرة الدكتور جابر نصار، نقلته الشروق بيقول فيه: «الأقليات الدينية في العالم  الإسلامي تتمتع بحقوق متساوية مع الأغلبية».. اقرا الخبر اللي فوق يا دكتور جابر لو سمحت وتعالى اتكلم.
كنيسة قنا ناشرين إعلان كبير في الأهرام بيشكروا فيه البابا تواضروس على زيارته لقنا والأقصر اللي صادفت نفس يوم عيد الشرطة. 

وبمناسبة عيد الشرطة جرنال اليوم السابع نشر الخبر دا: المحامي العام لنيابات جنوب الجيزة أحال ٢ أمناء شرطة للمحاكمة العاجلة علشان أخدوا رشوة لتهريب متهم بالسجن المؤبد (نسخة ورقية). ولو هانتكلم عن الهيبة، فـ ممكن نقرا مقال حلو للأستاذ جميل مطر، دي الخلاصة بتاعته: «الثورات رصيد لا يصح تبديده. هذا الرصيد إن بدد أو امتدت إليه أدوات الحقد والانتقام والجهل لن تعوضه استثمارات أو قروض أو الانضمام إلى أحلاف خارجية. لا شيء يعوض أمة من الأمم عن ثورة تباطأت مسيرتها، سواء تباطأت تحت الإصرار على إنكارها أو تباطأت بسبب شراسة الحرب الناشبة ضدها».

***

تارانتينو ومارتن في مصر

خبر في الأهرام والوطن بيقول إن ناس خطفت طفل وطلبوا فدية مليون جنيه من الأب. وعلشان يثبتوا جديتهم؛ قطعوا «صُباع» الطفل بمطرقة وأجنة وحطوها قدام جامع بيصلي فيه الأب، الناس دي منهم اتنين من أقارب الطفل.

***

حوارات الحبس

فيه حوارين النهاردة مع فاطمة ناعوت بعد الحكم بحبسها، الأول في المصري اليوم بتقول فيه إنها حافظة القرآن، والتاني في الوطن بتوجه فيه رسالة للمثقفين: نحن السابقون وأنتم اللاحقون، ومقال خالد منتصر في الوطن عن حكم الحبس بيتساءل فيه عن جدوى معرض الكتاب في بلد بتحبس اللي بيكتبوا.

***

حرامية

فيه فروق حصلت في تقدير أسعار البنزين بقيمة ١٠٠ مليون جنيه في وزارة التنمية المحلية (مفيش ولا جرنال شرح لنا إزاي دا حصل)، لكن اللي شرحه انفراد الوطنإن الوزير الخلوق أحمد زكي بدر، وزع الفلوس دي مكافآت على قيادات الوزارة. الإفيه إن المحرر كلم اتنين من وزراء التنمية المحلية السابقين اللواء محسن النعماني واللواء أحمد زكي عابدين وقالوا: آه دا بيحصل طول الوقت وشرعي و١٠٠ الميّة. المصري اليوم نشر عن نفس القضية طلب النائب محمد أنور السادات بيان عاجل من رئيس الحكومة.    على سيرة الحرامية.. النيابة اكتشفت إمبارح إن فيه غلط حسابي في مدة حبس جوز الحرامية (بحكم المحكمة) علاء وجمال مبارك، وإن باقي عليهم ٨ شهور لازم يستوفوهم.

***

سيناء

الإرهاب اتنقل بشكل واضح من رفح وبعدها الشيخ زويد، ودلوقت نقل أنشطته للعريش نفسها، ودا مؤشر بالغ الخطورة، أتمنى يكون فيه مراجعة وبحث عن حلول لإننا بنفقد يوميًا أرواح غالية لضباط وجنود على إيد تنظيم داعش سينا. تغطية النهاردة الإخبارية في عدد من الجرايد اللي لحقت خبر هجوم في العريش أسفر عن مقتل ٤ وإصابة ١٢ من الشرطة. وخبر عجيب غريب في صفحة داخلية في جرنال الأخبار بعنوان: «أين تهديد بيت المقدس بإعلان العريش ولاية إسلامية يوم ٢٥ يناير؟»، بيتكلم إن التنظيم وزّع بكثافة منشورات على الأهالي بتقول لهم اقعدوا في البيت علشان هانعمل هجمات كبيرة بداية من ٢٥ يناير (!).

جرنال الأخبار والبوابة انفردوا بخبر مقتل قيادي في داعش سينا. البوابة قالت إنه مسؤول خلية التمويل. والأخبار قالت إنه مسؤول نقل الهاربين.

جرنال الأخبار انفرد بوصول الدفعة الثانية من طائرات الرافال النهاردة وعددها ٣ طيارات.

***

تقشف

اللاقتصاد كله تقشف النهاردة. البداية كل الجرايد نقلت خبر فتح ملف ماسبيرو. الأهرام بتسميها خطة للإصلاح المالي والإداري في الحكومة. والمصري اليوم نقل خبر تخفيض ٦٠ مليار من دعم الطاقة السنة الجاية على دماغ المواطنين، وبالنسبة لرجال الأعمال وزير الصناعة بيقول في الشروق إن مصانع الأسمنت الجديدة هاتبقى كلها بالفحم، ودا بعد حوار مهم اتنشر إمبارح لوزير البيئة، في نفس الجرنال بيبشرنا فيه بحتمية الفحم، نسينا نشير ليه في اليوميات إمبارح.. فـ آسفين. والمصري اليوم نشر منفردًا خبر إننا هانواجه عجز الموازنة بسندات حكومية إماراتية، ودا بعد النقص الحاد في المعونات الخليجية اللي اتصرفت.

التقشف وصل وزارة الخارجية اللي بدأت تعاني بشدة من المرحلة الأولى اللي أخدت في رجلها مكاتب التمثيل التجاري في سفاراتنا في الخارج، حسب جرنال البوابة اللي نقل عن دبلوماسيين تحذيراتهم من الخطوة دي. مش بس الخارجية دا حتى الإنترنت في مصر بيعاني من تقشف في السرعات حسب تصريح مساعد وزير الإتصالات في حواره مع الوطن اللي قال فيه إن مصر تعاني من فقر شديد في الإنترنت.

نفس الجرنال بيحاول يكفّر عن ذنبه في «فرقعة» قصة «شاب الفريسكا - الجندوفلي» وعاملين النهاردة تقرير عن شاب معاه مؤهل عالي وكان متفوق في دراسته، لكنه بيسرح حاليًا بعربية فول. المحرر اتعمل مع الموضوع مش باعتباره: «واو.. ذيس إز كوووول»، لأ. المحرر نقل الآسى اللي عايش فيه الشاب وإن حلمه الوحيد دلوقت إنه يمشي من البلد. شكرًا للزميلة فاطمة مرزوق.

على ذكر الإعلام؛ عبد اللطيف المناوي، رئيس قطاع الأخبار في ماسبيرو وقت الثورة، بيوعظنا من موقعه الجديد كرئيس لقناة الغد العربي: إن تسييس الإعلام هو أخطر حاجة بنواجهها دلوقت (صحيح)، لكنه في نفس الوقت بيقول لنا إن: «التليفزيون المصري حقق أقصى درجات المهنية في أحداث يناير وتصوير كورنيش النيل (بدل المظاهرات) كان بديل لتسويد الشاشة (متشكرين جدًا)».

***

البرد

الأرصاد بتقول لنا إن بكرة هاتنكسر، مؤقتا، موجة البرد اللي وصلت ذروتها النهاردة، وتقرير من المصري اليوم عن سكاّن العشش في مواجهة الأمطار، اللي أثرت على وصول الموظفين لأشغالهم زي م نقلت لنا الشروق.

***

سوريا وليبيا

زي ما تابعنا إمبارح في اليوميات قصة الاستعجال الرهيب في تشكيل حكومة ليبية تميهيدًا، لما يبدو إنه حرب قادمة. النهاردة الشروق بتقول لنا إن رئيس الوزراء الليبي فائز السراج في سباق مع الزمن لتشكيل حكومة وحدة في ليبيا. وتقريبا كل محتوى جرنال الشرق الأوسط، أخباره بمقالاته، مكمّل في تفاصيل الحرب بالوكالة اللي بتخوضها المملكة مع إيران. وبعد صفحتين إمبارح عن التغلغل الإيراني في باكستان، مكملين النهاردة بملف تاني عن التغلغل الإيراني في أفغانستان. وبيكملوا الصفحة اليومية عن ليبيا، وحلقة النهاردة عن محاولات تحرير بنغازي. والحياة السعودية في لندن ناقلة خبر في “الصفحة الأولى” عن طلب بالسجن المؤبد لاتنين صحفيين أتراك كتبوا عن دور دولتهم في تهريب أسلحة لسوريا. وخبر تاني في الصفحة الأولى عن التعديل الوزاري في دولة قطر، لكن فيه جرنالين في مصر اهتموا بنفس الخبر وتحديدًا جزء واحد في الخبر دا، وهو تغيير وزير الخارجية: جرنال اليوم السابع اللي اتكتب فيه مقال عن الوزير الجديد محمد بن عبد الرحمن ال ثاني باعتباره حمامة سلام وعنوانه: قطر في القاهرة، وجرنال البوابة اللي قسّم الصفحة الأخيرة بين مقال عبد الرحيم علي (مش مهم)، وخصص النصف التاني من الصفحة(بدون اسم محرر) لمدح والاحتفاء بالوزير الجديد وتوضيح أدواره في التقريب بين مصر وقطر وعمل مصالحة (!).