سينما صيفي | ثورة عمال شاهين

عدد قليل من المخرجين المصريين اللي كانت نضالات العمال حاضرة في سينماهم، تحديدًا الروائية، وأكيد بييجي في بالنا رواد الواقعية الأولى زي صلاح أبو سيف، وأحمد كامل مرسي، وتوفيق صالح، والمخرجين اللي اشتغلوا في أثناء وبعد الحرب العالمية الثانية زي كمال سليم في «العزيمة» أو كمال التلمساني في «السوق السوداء»، وبالفعل البُعد الاجتماعي أو الطبقي موجود في أفلامهم.

لكن حضور الطبقة العاملة كمجال للنزاع والحق والتنظيم والنقابات، كحالة نضالية دائمة، ككتلة متحركة ثائرة، كجزء حقيقي من تاريخ عمال البلد غير المحكي، كانت بس تقريبًا في سينما يوسف شاهين. فرغم وصفه بالخواجة والمستشرق وإنه «مش مننا» و«ما يعرفش عرق الشعب»، هو أكتر شخص في السينما الروائية المصرية اتكلم عن نضال العمال.