يوميات قارئ صحف: 17 أغسطس 2015

جرنال التحرير بيحاول يقوم بالدور اللي الصحافة تنازلت عنه طواعية بعد 3 يوليو 2013 وهو مراقبة وأحيانا معارضة الحكومة. ده شئ نبيل ويستحق التحية والصحافة محتاجة فعلا تسترد روحها المفقودة خصوصا ومصر لأول مرة من أواخر السبعينات مفيهاش ولا جريدة معارضة واحدة. لكن مهم لينا كقراء إن الجرنال وهو بيعمل ده ياخد باله عشان تبقى المعارضة دي مسنودة بالوقائع وعشان ما يجيش انطباع للقارئ إن الجرنال زاعق من أجل الزعيق أو بيستخدم عناوين سخنة وناقدة بدون ما تكون العناوين مخدومة بالشغل الصحفي. النهارده لاحظت عدد من العناوين القوية لكن لما قريت المواضيع اللي تحتها حسيت بحاجة غلط. مثلا في خبر صفحة أولى وتقرير داخلي عن تكليف الزند للجنة في وزارة العدل انها تراقب صفحات القضاة على فيسبوك وتعمل تقرير كل يوم بالمكتوب عليها. الخبر مهم طبعا وصحيح والقرار الصادر رقمه 4900 لسنة 2015 وبيقول نصا إن من مهام اللجنة "متابعة يومية ورصد لكل ما تتناوله مواقع التواصل الاجتماعي سواء العامة أو الخاصة بأعضاء الهيئات القضائية في هذا الشأن، وتحليل ما يذاع وفق الأصول المهنية المتعارف عليها وتحديد ما يعد مخالفة لهذه الأصول ويشكل جريمة للعرض على التفتيش القضائي "إدارة الشكاوى" لاتخاذ اللازم، وإعداد تقرير يومي في هذا الصدد يعرض على وزير العدل"، لكن الخبر قديم والقرار صادر من شهر ونص واتنشر بالفعل في الجرايد بل حتى اليوم السابع نشرت صورة للقرار في 30 يونيو اللي فات هنا. نفس الحاجة في عنوان مخيف لموضوع على نص صفحة النهارده: "خداع «الصحة».. 150 حالة اشتباه بـ«الالتهاب السحائي» في 4 مستشفيات" لكن لما تقرا الموضوع مش هتلاقي العنوان دقيق وهتلاقي طبيب واحد مش عارفين اسمه في مستشفى واحد بيقول إن جالهم 150 حالة اجهاد حراري وحولوها على مستشفى الحميات. ده موضوع خطير يمس حياة الناس ومحتاج تدقيق. المثال التالت في نفس السكة خبر عنوانه: "الفساد وراء حريق سنترال العتبة"، لما تقرا الخبر هتلاقي مصدر واحد بدون اسم في المصرية للاتصالات شاكك إن الحريق بفعل فاعل لإنه حصل في الأدوار الإدارية من السنترال. ده دليل ضعيف جدا على عنوان قوي بالشكل ده. وحتى الموضوع الأبرز في الجرنال النهارده عن مشروع المليون فدان بعنوان "التحرير تكشف حقيقة المليون فدان: مشروع الوهم"، طبعا الصحافة لها ألف حق تدرس المشروع الجديد وتطرح تساؤلات وشكوك حتى حواليه ويحسب للجرنال الجرأة في التشكيك في مشروع تاني يوم بعد السيسي ما ناقشه، لكن الملف لما قريته لقيت فيه نقطتين رئيسيتين أولهم إن أغلب الاراضي مفروض تستصلح من أيام مبارك والتاني إن الميزانية المقدرة للمشروع مش هتكفي. ده مش معناه إن المشروع "وهمي". جايز يطلع وهمي بشوية تقصي زيادة. دي مجرد ملحوظة من قارئ معجب بالجرنال في ثوبه الجديد وحريص على مصداقيته ويتمنى له الاستمرار والنجاح لمصلحة المهنة وقراء الصحف.

----------

في التحرير كمان النهارده خبر إن أطباء مستشفى القصر العيني لموا من بعض 350 ألف جنيه لتركيب تكييف مكزي جديد في المستشفى اللي توقفت فيها العمليات الجراحية امبارح عشان تعطل التكييفات في الحر. وتقرير عن شكوك في عودة عمرو أديب لتقديم برنامجه القاهرة اليوم عشان الأزمة المالية للفضائيات وصلت حتى لقناة أوربت. بالمناسبة أخوه عماد الدين أديب كان كتب امبارح عموده في الوطن عن الأزمة المالية للفضائيات. التقريرين مش عالموقع لسه. أحمد الصاوي كتب يطالب بحبس المساجين في بيوتهم عشان يبطلوا يموتوا من الحر ومحمد فتحي كتب يفكر الريس بوعده لشباب الإعلاميين بالعفو عن سجناء التظاهر.

----------

المصري اليوم مكملين تغطية الأوضاع في مستشفى الخانكة بعد كارثة وفاة المرضى من الحر والنهارده عاملين ملف حلو على صفحتين بعنوان: "«المصري اليوم» داخل عنابر الموت بمستشفى الخانكة للأمراض النفسية". وبمناسبة الحر المصري كاتبين إن عدد الوفيات وصل 97  ووزارة الصحة بتطالب المواطنين يلزموا منازلهم. ونقابة الأطباء نشرت صور بتحذر من وفيات للمرضى في مستشفى الجذام في العمرانية، و"توقف ماكينات الغسيل الكلوى ببنى سويف بسبب انقطاع المياه والكهرباء"، وأخيرا بعد وفاة 3 مساجين في قسم أول شبرا الخيمة مدير أمن القليوبية قرر يركب تكييفات في القسم. أهالي الشيخ زويد ورفح بيدوروا على بعثة تقصي الحقائق بتاعة المجلس القومي لحقوق الإنسان اللي يبدو إنها زارت بعض أحياء مدينة العريش وروحت من غير ما تزور رفح والشيخ زويد أكتر المناطق المنكوبة. في المصري كمان تغطية لجلسة محاكمة مرسي في قضية التخابر لقطر اللي اتخصصت لسماع شاهد ممنوع نشر صورته أو اسمه عشان ضابط في أمن الرئاسة لكن التقرير والشهادة فيها تفاصيل بنعرفها لأول مرة عن نظام التصنيف السري للتقارير في رياسة الجمهورية. وخبر "السعودية تعلن القبض على ٤١٣ «داعشياً» بينهم ٧ مصريين"، ومؤشرات تراجع حكومي في المفاوضات مع الموظفين بخصوص قانون الخدمة المدنية فمحلب هيجتمع بكره مع النقابات الرافضة للقانون وهنشوف النهارده هيحصل إيه في المظاهرة المعلن عنها.  وطبعا الخبر المسخرة إن وزير الداخلية قرر يشكل لجنة طبية لبحث الافراج الصحي عن توفيق عكاشة بعد مصطفى بكري ومرتضى منصور ما اجتمعوا بالوزير امبارح.

----------

موضوع حلو في الشروق عن "الحرمان من حلم جامعة القاهرة" بخصوص قرار وقف قبول طلاب الأقاليم في الكليات اللي ملهاش نظير في المحافظات زي الاقتصاد والعلوم السياسية والإعلام والسبب على لسان "«أمين الأعلى للجامعات»: «مفيش حاجة اسمها كلية فريدة أو مرموقة.. وطلاب الصعيد يدرسون بهذه الكليات ولا يعودون لبلادهم مرة أخرى ويزحمون المواصلات»". ومن أخبار الشروق: "«القومى للاتصالات» يطعن على حكم حجب المواقع الإباحية داخل مصر"، وإصابات في أسيوط بالتسمم بسبب تسرب غاز الكلور لمحطة المياه، واعترافات "خلية العمل النوعي" في الغربية، و"الصراع على إدارة الإخوان يمتد لقناة «مصر الآن»". خالد علي كتب مقال عن قانون الخدمة المدنية ونجاد البرعي كتب تحت عنوان "اتقوا الله" عن وفيات المساجين بسبب الحر والتكدس.

----------

في الوطن ملف على صفحتين عن الحر بعنوان "الطقس فى مصر: حار «قاتل» صيفاً" وتحقيق عن موت الأسماك ومعاناة الصيادين في بحيرة قارون. وبداية التمهيد لضربة مصرية تاني لليبيا بعنوان "دبلوماسيون مصريون يطالبون القاهرة بضرب معاقل «داعش»" في ليبيا (مصطفى بكري كمان ابتدا يسخن في نفس السكة في جرناله النهارده). وتقرير من مصادر مجهلة إن حزب الوسط بيجهز لمبادرة مصالحة جديدة بالتنسيق مع الجماعة الاسلامية وحزب الوطن السلفي (وموضوع مشابه في المصري اليوم).

----------

جرنال البورصة غطى هبوط سهم جهينة وهبوط البورصة عموما امبارح بعد التحفظ على أموال صفوان ثابت. و"الصرافات المتحفظ على أموالها تبدأ إجراءات التظلم أمام الأموال العامة". ودراسة لبنك أوف أمريكا طلعت مصر في المركز الخامس عالميا كأخطر دين سيادي بعد باكستان وفنزويلا واليونان وأوكرانيا. الدراسة دي هنحتاجها بعدين فافتكروها.

----------

الأهرام نشرت تغطية موسعة لمشروع قانون الصحافة والإعلام الموحد اللي اتنشر امبارح وممكن تقرا نص المشروع على بوابتهم هنا.

----------

في الحياة السعودية: "الأمن (المصري) يوقف 4 قبل تسللهم «للانضمام إلى داعش» في ليبيا"، وأرشح لك مقال جورج سمعان "«ربيع» العراقيين يهزم نظام المحاصصة و... التقسيم؟" وموضوع عن الاعلام البديل في سوريا اثناء الحرب الدائرة، ومعرض صور في القاهرة "فوتوغرافي إيطالي يرصد مفارقات حياتية في مصر".

----------

الشرق الأوسط السعودية نشرت تقرير عن الاستعدادات الانتخابية لحزب النور بعنوان: "حزب النور يسعى لحصد إرث الإخوان في البرلمان". وتفاصيل القبض (ببصمة العين) على "الشيخ" أحمد الأسير في لبنان أثناء محاولته السفر لمصر ومنها لنيجيريا وبروفايل حلو عنه. كمان تقرير "السلطة الفلسطينية تسعى إلى تطوير العلاقات مع إيران عقب الاتفاق النووي"، و"تونس تسعى لإحداث منطقتين للتبادل التجاري الحر على حدودها مع ليبيا والجزائر"، و"مجموعة اليورو توافق على خطة إنقاذ اليونان بإجمالي 86 مليار يورو.. لاغارد (مديرة صندوق النقد) ترحب بالاتفاق وتطالب مجددًا بشطب جزء من ديون أثينا". وأرشح لك موضوع حلو عنوانه "هل كان أدب الثورة السورية على مستوى الفجيعة؟"

----------

شكرا لكل من كتبوا وأواصل تلقي ترشيحاتكم ومقترحاتكم وتصويباتكم وتعليقاتكم على [email protected]